موقع صوت المسيحي الحر

العودة الى الرئيسية

سقوط شاب فى ظروف غامضة ..

منذ 3 شهر March 13, 2018, 5:10 pm



رامز شاب جارى عنده 33 سنه بيشتغل مندوب أدويه ، من حوالى عشر أيام أثناء شغله جاله صداع شديد فى دماغه ، أخدله مسكن وخف عليه ، هو أفتكر من إرهاق الشغل وقلة النوم جاله الصداع ، تانى يوم جاله نفس الصداع بس أقوى خد حباية مسكن ماجبتش نتيجه ، خد حبايه تانى سكنتله شويه ، مديره فى الشغل شاف كدا قاله روح أكشف ، رامز رفض وقال ان ده اكيد دور برد بسبب تقلبات الجو واكيد هايروح لحاله مع كام برشامه للبرد ، روح البيت خد مسكن مع علاج للبرد ولمون مغلي ونام ، صحي تانى يوم جسمه كله متخدر بسبب كمية المسكنات اللى واخده ، خد اليوم راحه وماشى على العلاج اللى طلعه لنفسه ، بعد كل وجبه حبيتين مسكن ، ومضاد حيوى للبرد كل 12 ساعه ، عدا يوم وأتنين وتلاته على الحال ده ، وهو يجيله الصداع ياخد جرعة المسكن وبزياده كمان ، لغاية ماجه يوم الأتنين الموافق 13 مارس الساعه 2.10 بعد الضهر ، وهو راجع من شغل وقع أغمى عليه فى نص الشارع ، الناس كتر خيرهم شالوه وقدموله إسعافات أوليه ، هم كانوا فاكرين عنده ضربة شمس بسبب موجة الحر وحاولو يشربوه سوايل كتير ، لكن هو مافيش إستجابه أبدا ، بعد ما غلبوه معاه بعد وقت طويل ، قرروا ينقلوه على المستشفى وتشخيص الدكتور كان صادم . 
جلطه فى المخ .
لو رامز كشف من الأول وعالج السبب الرئيسى للصداع كان تفادى الجلطه .
لو الناس نقلوه على المستشفى على طول قبل ما يحاولوا يشخصوه على مزاجهم كان تأثير الجلطه خف شويه ، لكن رامز أتكتب عليه يعيش بشلل نصفى طول حياته والسبب انه حاول يعالج الصداع ونسى يعالج سببه. 
احنا كمان بنستخدم الأسلوب ده دايما فى حياتنا ، الواحد يكون مضايق ولما نتسأل مضايق ليه يقول مش عارف ،ويتخبط يمين وشمال يعالج ضيقته اللى هو اصلاً مش عارف سببها إيه ومش عاوز يحاول يعرف سببها أو خايف يقلب فى دفاتره القديمه عشان يعالج السبب فايلجأ لطرق كتيره أشبه بالمسكنات اللى فى النهايه بتقضى عليه .
واحده تكون مجروحه من علاقة حب تقوم تدخل فى علاقه جديده عشان تنسى وجع الأولى هى كده بتعمل جرح جديد مش بتداوى ولا حاجه .
واحد عاوز يبطل التدخين يقوم جايب شيشه الكترونيه ضرر بردو .
واحد يكون حابب يعالج مشكله فا يعمل مشكله أكبر .
أى حاجه فى حياتك لو ماوقفتش وقفة جندى شجاع تواجه المشكله راجل لراجل صدقنى مستحيل تتحل . 
المسكنات بتخدرك مش بتخدر المشكله
ده أحياناً المسكنات الحياتيه بتكون منشط للمشكله كمان .
بقلم/#كيرلس_فتحى 
الشير مهم جدا لدعم الصفحه                      







كن أول من يعلق علي الخبر
كتب بواسطة Mora
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.