البحث

تابعنا على

العودة الى الرئيسية

احذري وضع صورك علي الفيسبوك ..هاااااااااااااام لكل الفتيات

منذ 8 شهر
August 4, 2018, 7:17 am
احذري وضع صورك علي الفيسبوك ..هاااااااااااااام لكل الفتيات

أنا بنت عندى 23 سنه ، إتخرجت السنه اللى فاتت من كلية علوم ، إتقدملى شاب عنده 31 سنه مهندس بترول ومن عيله كويسه ، وافقت عليه مبدئياً بسبب مواصفاته وإمكانياته الماديه والإجتماعيه الكويسه ، لكن طلبت اننا لازم نقعد الاول مع بعض اكتر من قعده عشان نعرف شخصيات بعض كويس ، قعدنا أربع مرات وإرتحنا لبعض بعدها حددنا ميعاد الخطوبه يوم 23/2/2017
تمت الخطوبه ،كنت فرحانه جدا جدا وأخيراً حققت حلمى ولاقيت فارس أحلامى شاب محترم ومن عيله كبيره وحالته الماديه عاليه جداا ، وفى يوم 24/2/2017 نزلت صور الخطوبه على الفيس مع كلام رومانسى لخطيبى ، بعدها لاحظت شاب معرفهوش شاف صورة بروفيلى ، وبعتلى كلام فى قمة السفاله ، خطيبى معاه الباسورد بتاعى ، فتح وشاف الرساله ، وقامت خناقه مابينا بسبب انه كان رافض موضوع صورى تنزل على الفيس ، ومن بعدها وبدأت الخناقات ما بينا على أتفه الأسباب .
انا من الشخصيات اللى بخاف جدا جدا من الحسد ، يعنى لو اتكعبلت فى الشارع ممكن افتكر انه بسبب واحده زميلتى قالتلى ايه الحلاوه ده ، عندى وساس رهيب بسبب كدا ، بس كان لازم انزّل الصور عشان كل البنات بيعملوا كدا ماجتش عليا يعنى ، لازم الكل يشوفنى فرحانه . إشمعنى هم .
لغاية ما فى يوم زادت المشاكل ما بينا وساعتها قررت أمسح كل الصور بتعتى من على الفيس ، مش إرضاء لخطيبى لإنى لو عاوزه ارضيه كنت مسحتهم من الأول ودى كانت غلطتى اللى اكتشفتها بعدين ،لكنى مسحتهم عشان خوفت جدا من الحسد ،لكن النتيجه كانت غير متوقعه تماما ً ، الخناقات مازالت مستمره مابينا ، وفى يوم 5/6/2017 كنا فى خروجه وقررنا الإنفصال ، لكن سألته انت كدا هاترتاح ؟
جاوب وقالى
- انتى ماعندكيش أى خصوصيه ، صورك كلها على الفيس بأى لبس وفى أى مكان ، كل اسرارنا بتحكيها لصحباتك ، بتسمعى كتير ليهم ، بتغيرى جدا منهم ، واى حاجه هم يعملوها يبقى لازم إحنا نعملها ، مش مهم انا مشغول ولا لا ، مش مهم ظروفنا ايه ، لكن الأهم اننا لازم نعمل زيهم ، مش حاسه بأى مسئوليه اهم حاجه عندك ازاى تكونى سعيده وبس ، ونتصور وانتى سعيده ، عشان الناس لازم يشوفونا مبسوطين وعايشين احلى قصة حب ، لكن عمرك ما فكرتى انا سعيد ولا لا ، عمرك مافكرتى إزاى ترضينى ، دايماً بتفكرى ازاى أرضيكى ، كل مشاكلنا لازم تحكيها للناس بره ودى اكتر حاجه بكرها ان خصوصياتنا الناس تعرفها حتى لو كانت لاقرب صحباتك . 
أنا عارف ان من حقك تكونى سعيده وزى كل البنات تتفسحى وتعيشى احلى أيام حياتك ، بس لازم تحطى فى باللك انك بقيتى مسئوله عن شخص اصبح حياتك كلها ، مُلزمه انك تحسى به ، وتحاولى تسعديه لكن انتى كل اهتمامك ازاى تظهرى للناس انك مبسوطه وفرحانه
الحياه الزوجيه مش فاترينه بنعرض فيها يوميتنا عشان الناس تتفرج علينا ويدوسوا لايك وكومنت جميل ، العلاقه الزوجيه كيان مبنى على الخصوصيه والتعاون والإحساس والتحمل بينا وبين بعض  
نصيحه منى .نسبة حبك لشريك حياتك هاتحدد مدى نجاح حياتك الزوجيه  
خلص الحوار وسيبنا بعض بعد ما علمّنى أعظم درس فى حياتى .
بقلم/ #كيرلس_فتحى











شارك بتعليقك
فيسبوك ()
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.