البحث

تابعنا على

العودة الى الرئيسية

كيرلس فتحى يكتب ..ليلة فى حضرت الجن

منذ 2 شهر
January 7, 2019, 7:04 pm
كيرلس فتحى يكتب ..ليلة فى حضرت الجن

 

إمبارح بالليل وانا مروح من الشغل كان لازم أعدى من شارع جانبى عشان أوصل للطريق العمومى ، كانت فى حدود الساعه ٣:٣٦ الفجر ، الدنيا كانت برد جدا ورياح بارده شديد، وماكنش فى حد الشارع غيرى ، وانا ماشى فى الشارع والإضائه خفيفه ، والسما مغيمه تماماً والقمر مش باين فيها ، فجأه لاقيت ظل قدامى لكائن بأربع رجلين ، بيتحرك حركه بطيئه جدا ، بصيت يمين وشمال مالقتش حاجه خالص ، بصراحه خوفت لأن اليوم ده واحد حكى معايا قالى الشارع ده زمان قامت فيه خناقه كبيره وواحد إتقتل ، وبيظهر للناس دايماً بطريقه مختلقه ، مره يطلع فى صورة ديك ، مره فى صوره ثور ، مره فى صورة كلب  
ومره طلع لواحد فى صورته الحقيقه ، كان ضخم جدا ودراعاته طويله جدا وواخده شكل الأخطبوط ، وجسمه جسم غوريلا ، وراسه راس ثعلب
انا أفتكرت كل الكلام ده وحسيت فعلا إن قلبى واجعنى من كتر الخوف ، وسبحان الله كأن الناس إنقرضت مافيش مخلوق ماشى فى الشارع غيرى
إتثبت مكانى وعينيا دى فتحتها ١٨٠ درجه مابقتش عارف أجرى ولا أمشى ولا اعمل ليه ، الظل كل ماله ما بيكبر ويتحرك ، وخيالات دماغى اشتغلت وكأنى فى فيلم رعب ومستنى دراكولا بقى يطلع فجأه يعضنى فى رقبتى وسط الصمت الرهيب اللى انا فيه ده  
من شدة الخوف حسيت بحر شديد ، بعد ما كانت الدنيا برد
بدأت أتحرك بشويش خطوه خطوه ، وانا مركز جامد فى الظل ده ورامى ودانى فى كل حته براقب به أجواء المكان عشان أكون مستعد لأى حاله مفجأه
كان الشارع فيه شجره كبيره وقديمه جدااا فروعها مغطيه الشارع ، متشرخه ولون خشبها بدنى داكن جدا ، شجره عجوزه قوووووى بس فروعها كتير ومليانه ورق ، الورق بتاعها كان عريض جدا وسميك ، فى العواصف والرياح الشديده لما تخبط فى فروع الشجرن تعمل صوت يرعب
لما وصلت للشجره بدأت أسمع صوت حاجه بتزوم ، الأول انا كنت فاكره صوت الشجره ، لكن لما وقفت لحظه وركزت شويه لاقيت الظل وقف مع وقفتى وأكتشفت ان الصوت ده مش من الشجره ، ده صوت ورايا اللى هو اصلا صوت الشئ اللى ظله مسيب ركبى من الصبح ، مابقتش عارف ابص ورايا واواجه مصيرى المجهول، ولا أجمد قلبى ومايهمنيش وامشى عادى ، ولا أجرى
بصراحه حاولت أجمد قلبى لكن فشلت من أول محاوله ، كان عندى فضول غريب أعرف أيه اللى بيزوم ورايا ده
لكن إختارت الأختيار الأخير  
لازم أجرى ، بسرعه البرق اخدت ديلى فى سنانى وبقيت أجرى لغاية ما طلعت على الطريق العمومى ولاقيت عربيات وناس وقلبى إطمن شويه
وقفت وبصيت ورايا على الشارع اللى كنت فيه
لاقيت حاجه غريبه جدا ماكنتش أتوقعها
لاقيت كلب بيتخانق مع قطه 😰 أنا إتصدمت بقيت أقول لنفسى
يعنى مافيش عفريت!!
يعنى كل اللى سمعته عن الشارع ده خرافات ؟
ولا حد بيجرى ورايا، واصلا الكلب اللى كان بيزوم ده ماكنش يقصدنى انا كان بيجرى ورا القطه !!!!
طب والخوف اللى خوفته دانا كنت هاموت من الخوف ، والجرى اللى جريته ومنظرى قدام الناس اللى شافونى وانا خارج من الشارع خايف وبجرى
كل ده راح فى وهم !!!😰
ساعتها عرفت حاجه مهمه جدا الخوف اللى بحس به مع كل خطوه جديده باخدها وتخويف الناس ليا من الفشل والخساره وتضيع الوقت كل ده مجرد وهم .
ايوه وهم وخرافات انا برسمها فى دماغى مالهاش اى أساس من الصح ، ده بالعكس الخرافات دى بتكون مسئوله مسئوليه كامله فى فشلى لأنه بتعجزنى وتشتت تفكريى وتضعف قدراتى
الخوف من الفشل يعتبر فشل فى حد ذاته
لو فشلت اكتر من مره ساعتها هايكون عندك خبره فى الفشل ومن الصعب تفشل بعد كده
الشجاعه نجاح والخوف فشل
بقلم/#كيرلس_فتحى













شارك بتعليقك
فيسبوك ()
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.