البحث

بعد احداث كنيسة منشية الزعفرانة ماجدة سيدهم تكتب القانون السيف مش المزيكا ..

منذ 5 شهر
January 14, 2019, 11:49 am
بعد احداث كنيسة منشية الزعفرانة ماجدة سيدهم تكتب القانون السيف مش المزيكا ..

ماجدة سيدهم
وبكدا يابيه  أصبح الإجرام  هو السلطة ذات التأثير  الأعلى  وهو القوة الباسطة  يدها بكل البطش  والتى لايعلو عليها  قانون  أو عرف  أو هيبة أو قيم

وعيني عينك  أصبح  العفن الذهني هو المرجعية الوحيدة   التى يستند  عليها كل محتل  فاجر وأحمق وبلطجي ويرجع إليها كل خبيث  مسؤول أو اعلامي  يدعي التعقل  والمواطنة ليشعل الأحداث بالاستفزاز والاستثارة  وهو في حقيقة الأمر في باطنه  سعيد لمايحدث بل  متواطيء  وبخسة

دقيقتين كدا يابيه ماتسمعش  فيهم الله يخليك  لا لمستشارين ولا لإعلامييبن  ولا لبتوع لجنة إيه على إيه   لكن افتح أي فيديو  من على جوجل  واكتب بس    أحداث المنيا  وشوف بعينك   واتفرج  على الشرف والمرجلة واسمع  بودانك السباب والشتائم  القذرة  ليهجم شوية  ناس  شايطة على ناس تانية ف حالها في نفس البلد لمجرد أنهم مختلفين عنهم في العقيدة  (ارتيكاريا ) . أهو  أدامك أهو   مش فبركة ولا حاجة  

المصيبة الناس المتظاهرة دي  واكلهم المرض وناحل جتتهم العري والفقر ومشلفطهم  الجهل وماسح بكرامتهم الأرض شوية مشايخ معتوهة موحولين  في وساخة  التراث السلفي  

 و قدروا يخلوا شوية الناس دول  مجرد حثالة وهمج ورعاع  ماتستغربش  يابيهأيوه  دول من شعبك ومن نتيجة  تعليم وزارتنا   وتجديد خطابنا الديني  ومن  تأثير اعلام  مش هنا  خالص

معلهش يابيه هي المشاريع الضخمة اللي بتعملها دي لمين لما اغلب الشعب عايش في الوبا  وبيكره بعضه  وبيطحن في بعضه إحنا بصراحة  ماننفعش  ولا تقولي نبتدي بالتعليم ولاخطاب ديني ولا طيني ولا بتنجاني كله فشل وحايفضل يفشل

لما نوصل لمرحلة نتودد فيها للهمجية  ونتشاور مع الفوضى وناخد وندي مع الانحطاط  ونمشي كلمة البلطجية  يبقى كله بزرميط

ويبقى الحل الوحيد ومافيش غيره  علشان نلم الليلة  دي  هو فصل الدين نهائيا  عن الدولة   وتطبيق  القانون الصارم وفورا كفاية مهازل   يطبق القانون على الجميع بلا استثناء التربية بالقانون الأدب بالقانون السلوك  والإلتزام  والتهذب والاخلاق  والقيم  الإنسانية والمواطنة والتعايش  والحقوق والواجبات حتى النظافة  تفرض فرضا بالقانون

 أيوه  مش عيب إحنا محتاجين  نتربى من جديد وبقبضة من  حديد  ومن غير مناقشه  كفاية قلة قيمة  لما بقينا مضحكة العالم فاكر لما قولت لك القانون والفنون هما الحل 

أقسم بالله لو طلعت دلوقت على التليفزيون  وبالعين الحمرا قولت الكلمتين دول  كله  حايجيب ورا في ثواني السيادة للقانون يافندم القانون السيف مش اللي بيطلع مزيكا  .والله تعبنا  والله تعبنا

.آخر حاجة سؤال  هو  إنتو مابتطبقوش القانون ليه يابيه !

      اقباط متحدون 















شارك بتعليقك
فيسبوك ()



احجز الان فى العاصمة الجديده تليفون 00201123000014

تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.