البحث

السيرافيم هل هم نوع من الملايكة اللي رُتبِتهم عالية لإن ليهم اسم غير ملايكة؟

منذ 3 اسابيع
March 12, 2020, 11:01 pm
السيرافيم هل هم نوع من الملايكة اللي رُتبِتهم عالية لإن ليهم اسم غير ملايكة؟

مواضيع عامه 

السيرافيم هل هم نوع من الملايكة اللي رُتبِتهم عالية لإن ليهم اسم غير ملايكة؟

ويمكن كمان لإن ليهم ستة أجنحة مش جناحين زي الملايكة الباقيين. +المعنى بالعبري هو burning ones يعني "المُولَّعين". خلوا بالكم إنه فعل مضارع مستمر. وكانوا السرافيم دول مهمتهم الأساسية تقديم العبادة أمام عرش الله والمرة الوحيدة اللي اتذكروا فيها في الكتاب المقدس كله هي في إشعياء ٦. وفِي مُفسرين بيقولوا إنهم نفس الكائنات اللي ذكرهم يوحنا في
رؤيا ٨:٤. وسبب تسميتهم كده هو كَمّ النور والضوء الشديد اللي خارج منهم واللي هو أصلاً مش منهم لكنه إنعكاس لمجد وقداسة الله.
كُتَّاب كتير زمان كانوا بيوصفوا الدخول لمحضر الله كأنك بتخطو جوة منطقة خطر. ليه؟ لإنك لو داخل زي ماانت كده بكل الشوائب اللي فيك، لازم هتتحرق. فاكرين لما موسى قال للرب "أرني مجدك" قاله ماتقدرش تشوف وجهي "لإن الإنسان لا يراني ويعيش." ووضعه في نقرة في الصخرة وخبأه بإيده لحد ما عدَّى قدامه لإنه مش هيقدر يعاين النور ده كله ومايتأثرش. (خروج ٣٣).
كتير مننا مش بيبقى عايز يِقَّرب من الله لإنه خايف من النور والمجد اللي خارج منه لئلا يتفضح وخطيته تبان. بس لما تفكر فيها، كام واحد أصبح عبد لخطية معينة تعباه ومبهدلاه ومش عارف يخلص منها؟ بيجرب كل حاجة يقدر يعملها لكن برضه مش قادر؟ كام مرة تسمع شكوى من حد إنه عارف كويس قوي مشكلته فين وإيه اللي مِنَغَّص عليه عيشته زي دَاوُدَ لما قال “لِأَنِّي عَارِفٌ بِمَعَاصِيَّ ، وَخَطِيَّتِي أَمَامِي دَائِمًا.” (مزمور ٣:٥١)، لكنه مش عارف يعمل فيها إيه؟
أقولك أنا وعن تجربة. اختار إنك تِقَّرب من ربنا. تعال وأسجد قدامه كل يوم. كل يوم. يمكن في الأول هتعافر وهتفشل لكن إصرارك إنك تعمل كده بيعلن لأبوك السماوي صدق نيتك إنك تنضف. في الأول كمان تسليط الضوء هيكون صعب زي ما تفتح عينك فجأة على نور قوي، بس شوية شوية هتشوف وتدرك حجم خطيتك وتندم وتتوب. وإنت بتعمل كده، النار والنور اللي خارجين منه، اكيد اكيد هيحرقوا كل حاجة مش طاهرة فيك. بدون مجهود منك. خالص. "ليس بالقدرة ولا بالقوة بل بروحي قال رب الجنود." زي بالظبط القش اللي بيتحرق في ثانية لو النار بس هَوِّبت ناحيته. فتلاقي تُقل الخطية خف وانزاح وتقوم خفيف وحر. ولما تسمع كلمات بتقول "كونوا قديسين"، هتفهم إنه أمر ممكن وبيحصل. مش ممكن ابونا السماوي يكون عاوزنا نشوفه وهو عارف إننا "بدون قداسة لن يرى أحد الله" ولا يمكننا من الطريقة. إحنا مانقدرش عالخطية بس هو دهسها ودهس ابوها بدم صليبه.
عاوز تكون زي السيرافيم؟ مِوَلَّع على طول؟ عايز تقترب من عرش النعمة وتشوف نور مجده وتعكسه على كل اللي حواليك؟ اسمحله يحرق كل الشوائب والزبالة اللي مش بتمكنك إنك تعمل كده. مفيش شعور يوازي من قريب ولا بعيد، شعور معاينة وجه الله والقرب منه.

“فِي سَنَةِ وَفَاةِ عُزِّيَّا ٱلْمَلِكِ ، رَأَيْتُ ٱلسَّيِّدَ جَالِسًا عَلَى كُرْسِيٍّ عَالٍ وَمُرْتَفِعٍ، وَأَذْيَالُهُ تَمْلَأُ ٱلْهَيْكَلَ. ٱلسَّرَافِيمُ وَاقِفُونَ فَوْقَهُ، لِكُلِّ وَاحِدٍ سِتَّةُ أَجْنِحَةٍ، بِٱثْنَيْنِ يُغَطِّي وَجْهَهُ، وَبِٱثْنَيْنِ يُغَطِّي رِجْلَيْهِ ، وَبَٱثْنَيْنِ يَطِيرُ. وَهَذَا نَادَى ذَاكَ وَقَالَ: «قُدُّوسٌ، قُدُّوسٌ، قُدُّوسٌ رَبُّ ٱلْجُنُودِ. مَجْدُهُ مِلْءُ كُلِّ ٱلْأَرْضِ ».” (إشعياء ٦: ١-٣).

منقول 

 




اشتراك في قناه جون المصرى | Youtube


















شارك بتعليقك
فيسبوك ()



هام جدا

تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.