جبر بخاطري .. عمر كمال يروي موقفا إنسانيا لتامر حسني معه

منذ 2 شهر
July 10, 2020, 5:42 am

جبر بخاطري عمر كمال يروي موقفا إنسانيا لتامر حسني معه

أستعاد النجم عمر كمال ذكرياته من إحدي الحفلات مع النجم تامر حسني ، حيث روي موقف جمعه بتامر حسني من خلال بوست نشره عبر صفحته الرسمية بموقع تبادل الصور والفيديوهات "إنستجرام".

وكتب : أنا بحب الانسان ده جداً ، من حوالى ٤ سنين كان عندى حفلة في العين السخنة في قرية سياحية كان في نفس اليوم الفنان تامر حسني عامل حفلة فيها ، والقرية بلغتنى إن فقرتى قبل تامر وهطلع أعمل الفقرة على نفس المسرح ، قولتلهم أستحالة ده يحصل لأن المنظم مش هيرضي عشان انا مش نجم ومش معروف ومحدش هيرضي يدينى الفرصة ديه ، قالولى احنا اصحاب الحفلة والقرار .

قولتلهم يعنى أعمل دعاية وأنا مطمن قالولى أعمل وأنا من جوايا متأكد وعارف ان محدش هيطلعنى على المسرح ده ، عملت دعاية وناس كتير من بلدى السويس قطعت تكت عشانى وطلعت كام ميكروباص صحابى عشان يشجعونى وعملت كل اللى اقدر عليه .

وأضاف : روحت يوم الحفلة لقيت الحفلة الساعة ٤ العصر على حمام السباحة ومفيش ولا مخلوق اصلا والدنيا حر جدا وحفلة تامر الساعة ١١ بليل في مكان تانى خالص من القرية ، حتى مغنتش من كتر ما كان مفيش ولا فرد الناس كلها نايمة لاما محدش جه عشان لسه بدرى ع حفلة تامر .

بقى شكلى وحش جدا قدام الناس هطلع كداب وعملت دعاية بالكدب وانا مليش ذنب ، كلمت طوب الارض عشان أوصل لتامر وقتها معرفتش محدش خدمنى ومحدش رضى يساعدنى .

واستكمل حديثه كنت انا وصحبى اسمه محمد سمير كان مؤمن بيا جدا ، روحت مكان حفلة تامر قعدت تحت المسرح من الساعة ٤ لحد الساعة ١١ قسما بالله حوالى ٦ او ٧ ساعات عشان اضمن ابقى جمب المسرح لانى لو روحت بليل محدش هيرضي يدخلنى وانا قسما بالله ما معايا حتى حق دخول الحفلة وكان قابض من القرية ٦٠٠ ج .

قعدت تحت المسرح بحيث أقدر اكلم أى حد واطلعله أغنى معاه حتى عشان منظرى قدام الناس يبقى حلو ، ٧ ساعات لحد ما النهار راح والليل جه و الحفلة اشتغلت وطلعت طبعا ، كان جمب المسرح جاردات ومنظمين و كله ملخوم في الحفلة وتامر .

وأنهي حديثه قائلاً : كلمت منظم الحفلة مرضيش يطلعنى وقالى استنى للاخر ، كلمت أصحاب الحفلة محدش طلعنى ، اتصلت بكل فنان ممكن يكون يعرف تامر محدش ساعدنى ، شكلى كان هيبقى وحش جدا قدام الناس انى مغنتش وابن بلدهم محدش حتى شافه عدى من قدام المسرح ، كلمت شخص محترم جدا اسمه حازم شغال مع تامر حسنى وحكيتله ، الراجل راح قال تامر ، راح قاله هاتهولى بسرعة وجبر بخاطرى وقدمنى للناس وغنيت جمبه واتصورت .وروحت رفعت الصور انى كنت ف الحفلة وغنيت .

يمكن هو مش فاكر الموقف ده حتى بس انا فاكرهوله إن كان انسان قبل ما يكون فنان وروحت طاير من الفرحة ونمت ف بيتى مبسوط وليه موقف تانى هحكيه في وقت تانى .

 

هذا الخبر منقول من : جريده الفجر





اشتراك في قناه جون المصرى | Youtube


تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.

نصائح للاستثمار الأفضل.. هل شهادات البنك 15% أو 12% ..الذهب.. العقار أم الدولار..تحليل جون المصري
احصل عليه من app store تحميل تطبيق صوت المسيحي من علي app store احصل عليه من Google Play تحميل تطبيق صوت المسيحي من google play