كلمات صعبة ومؤثرة يوجهها الفنان شريف دسوقي لجمهوره بعد بتر قدمه

منذ 3 شهر
June 9, 2021, 2:11 pm

كلمات صعبة ومؤثرة يوجهها الفنان شريف دسوقي لجمهوره بعد بتر قدمه
الفنان شريف دسوقي: يوم ما الدنيا ابتسمتلى رفعت ايديها بكل قوتها ونزلت على وشى وفوقتنى من وهم السعادة اللى عيشتنى فيه

#موقع_صوت_المسيحي_الحر
كتبت: ماريا ألفي
وجَه الفنان الكوميدي شريف دسوقي رسالة مؤثرة لجمهوره، وذلك بعد تجربته الصعبة التي عاشها منذ ايام وأدت إلى بتر قدمه.

حيث قال دسوقي، مساء أمس، عبر حسابه الشخصي على موقع التواصل الاجتماعي "فيسبوك"، :" انا المثال للشخص اللى ممكن تشوفه من وجهة نظرك منحوس ، يوم ماالدنيا ابتسمتلى رفعت ايديها بكل قوتها ونزلت على وشى وفوقتنى من وهم السعادة اللى عيشتنى فيه.





وسرد قائلاً :"حلم حياتى اكون معروف ومشهور وموجود فى وسط الحاجة اللى بحبها وبعد تعب وشقى سنين قدرت ، قدرت اعمل كل اللى بحلم بيه ، واخلى الناس كلها تشوفنى فى كل موقف بيقابلهم فى حياتهم ، قدرت اسببلهم سعادة بسيطة هى جزء رئيسى من طموحى ، ربنا وهبلى القبول والناس حبتنى زى ماحبتهم لكن مفيش حاجة بتدوم
وكل العجب ان الحاجة والسبب الرئيسى فى صعودك تكون هي الضربة القاضية اللى تنهى كل امالك وتقضى عليك نفسيا
ابتديتها من تحت الصفر ، طول عمرى بشقى وبتعب ومحدش حاسس بيا ولا حد واخد باله منى ، مستنى نص فرصة انى اثبت انى موهوب وموجود واد ثقة الناس اللى هتشوفنى ، سنين من عمرى راحت وانا بجرى من مكان لمكان ادور على دور ينصفنى ويشيل الغيامة من على عيون كل اللى حواليا واثبتلهم اد ايه انا فنان كبير وتقيل اوى فى مجالى.
والفرصة جتلى ، جتلى فى دور مكنتش اتوقع انه ينجح ربع النجاح اللى وصله ، فضل ربنا كبير عليا ، خلانى محط انظار الناس كلها بدور ممكن اى حد يأديه واللى حواليه ميحسوش بيه ، الدنيا طبطبت عليا اوى بحب الناس ليا ونظراتهم وتقديرهم للنجاح اللى قدرت احققه ، وبعد النجاح ده قررت انى اخد الدنيا بالاحضان واعمل ادوار وادوار تتخلد فى تاريخ السينما والناس تفتكرنى بيها للابد
مكنتش اعرف ان طعنه الغدر هتيجي وسط الدور اللى كان سبب فى قلب حياتى من ضلمة لنور ، جرح صغير فى رجلى وسط مشهد صغير قدر انه ياخد البناية اللى بنيتها لسابع سما وينزل بيها لسابع ارض
متعودتش فى حياتى ان المرض يهزمنى ، وعندى يقين من ربنا ان مفيش اى حاجة بتحصل فى حياتى الا وكان ليها سبب ومعنى ومغزى واكيد شايف ان ربنا شايلى الاحسن وان اللى حصل ده خلانى اشوف حب اللى حواليا واهتمامهم وتقديرهم ليا رغم انى اللى قدمتوا ليهم قليل ، واعتقد ان ده تصديقا للقول ، من احبه ربه ، حبب فيه خلقه.


وأختتم دسوقي قائلاً :"هرجع وهكون اشد واقوى من الاول ، هرجع وهشتغل ومش هخلى حياتى تقف ابدا على حاجة ، هحاول لحد اخر نفس فيا ، هرجع وعارف ان الناس اللى بتحبنى فى ضهرى ، هرجع علشان اسعدكم وعلشان اسيب جواكم ابتسامة وسعادة اتمنيتها ليكم طول حياتى".
 





اشتراك في قناه جون المصرى | Youtube


تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.

نصائح للاستثمار الأفضل.. هل شهادات البنك 15% أو 12% ..الذهب.. العقار أم الدولار..تحليل جون المصري
احصل عليه من app store تحميل تطبيق صوت المسيحي من علي app store احصل عليه من Google Play تحميل تطبيق صوت المسيحي من google play