البحث

تابعنا على

العودة الى الرئيسية

قضية خطف جورج .. بقلم كيرلس فتحى

منذ 1 اسابيع
January 7, 2019, 7:09 pm
قضية خطف جورج .. بقلم كيرلس فتحى

 

قضية خطف جورج بقلم كيرلس فتحى

 

بيشوى ٢٥ سنه ابوه وامه متوفين أعذب عايش معاه أخوه الصغير جورج١٥ سنه مريض بالقلب ، بيشوى بيشتغل محاسب فى شركة مواد غذائيه
يوم ٢٢ إبريل اللى فات إستدعاه مديره فى الشركه الاستاذ سامى الساعه ٩:٣٥ الصبح وده غير عادته انه يجى الشركه بدرى أصلاً ، لكن اليوم ده جه بدرى واول مادخل كلم بيشوى
جاله بيشوى وقاله
- خير يافندم حضرتك جاى بدرى ليه ، فى حاجه ؟
- لا أبداً يابيشوى العقد بتاعك إنتهى ولازم يتجدد
- ايوه يافندم بس العقد بتاعى بيتجدد فى أغسطس واحنا فى إبريل
- لا ماهو قانون العمل الجديد دلوقتى حصلت فيه تعديلات ولازم يتجدد عقدك دلوقتى
- طيب ممكن اقرا العقد اشوف التعديلا ايه
- يابيشوى ماتخافش مش هامضيك على بيع أملاكك ياعم
- هههه ماشى يافندم 
ومضى بيشوى العقد بتاعه وراح على شغله تانى
بعدها بأسبوع ، بيراجع على تقارير المصروفات لقى أرقام كبيره مكتوبه ، شك ان فى غلطه فى التقرير
أتصل بمديره الأستاذ سامى وقاله على الموضوع اللى حصل ، مديره قاله تعالالى ، راحه بيشوى
- ايه يابيشوى ماللك ؟
- يافندم فى مصروفات بأرقام مبالغ فيها والشركه ماجبتش الحاجات دى؟ 
- طب وانت مضايق نفسك ليه ، هو انت دافع حاجه من جيبك ؟ 
- مش فاهم يافندم تقصد ايه ؟ 
- اللى اقصده انك ماتفتحش على نفسك مشاكل كتير ، عشان تربى اخوك الصغير ولا انت عاوزه يوحشك ؟
- وانا مالى ؟
- ههههه، مالك إزاى دانت ماضى على كل حاجه  
- مضيت إمتى ؟
- العقد اللى انت مضيت عليه ده ، كان وظيفه لمدير مشتريات ، والورق اللى مضيت عليه مع العقد كان أذونات بصرف كل الفلوس دى ، يعنى لو أتكلمت يبقى بتبلغ على نفسك ، وماتخافش هابقى أديلك نصيبك ، حتى تعمل عملية القلب المفتوح لأخوك بدل ماهو كل شويه يتعب كدا ، ولا انت مش عاوزه يخف ؟ 

مشى بيشوى وهو دماغه مقلوبه وبيكلم نفسه ، مش عارف يعمل ايه يقبل الفلوس ويعالج أخوه ويأمن مستقبله ويتجوز ولا يتمسك بمبادئه
مهما كانت قوة الشخص الفلوس بتضعف ناس كتير خصوصاً ان الحال صعب ، وناس كتير مستعده تضحى نظير انها تجيلها فرصه زى دى
خلص بيشوى شغل الساعه ٥ وكلم أخوه جورج إطمن عليه وقاله انه هايروح يقعد على القهوه شويه وبعدين يروح البيت
راح بيشوى القهوه ووسط وهو قاعد جاله راجل كبير قوى فى السن وطلب مساعده ماليه
من عادة بيشوى أن أى حد من الناس دى يقابله لازم يديله ، قام بيشوى وإداله لكنه سمع حاجه غريبه جدااا من الراجل قاله
- روح يابنى يكفيك شر اللقمه الحرام
وكأن دعوة العجوز تحذير من موضوع الشركه خصوصاً ان بيشوى الفلوس بدأت تزغلل عينيه
سرح بيشوى بتفكيره وفاق على صوت رساله من تطبيق آيه كل يوم الرساله بتقول
ماذا ينتفع الإنسان لو ربح العالم كله وخسر نفسه  
وكأن ربنا قاصد يحذر بيشوى بخبطتين ورا بعض قبل ما الفلوس تعمى قلبه تماماً وتستعبده
هنا بيشوى بعت رساله صوتيه لمديره على الواتساب ، الرساله كان فيها إسلوب تهديد قوى جدا
الرساله كان متسجل فيها الحوار الأخير اللى دار بينهم وإعتراف مديره الأستاذ سامى بأنه المدبر الوحيد للخطه دى
بيشوى لما لقى مصاريف غريبه فى التقرير ورد المدير بتاعه فى التليفون ساعتها لما كلّمه كان هادى جدا وكأنه عارف ، ساعتها بيشوى قلق وحس ان مديره عارف حاجه زى دى فا قرر انه يفتح التسجيل قبل ما يدخله عشان يأمن نفسه لأن لو فى أى حاجه بيشوى بردو هايتعرض للسؤال القانونى لانه فى الحسابات  
جه رد الأستاذ سامى على رسالة بيشوى قاله
- تمام إنت حر .
بعدها بحاولى ساعه كانت تقريباً الساعه ٨:٣٢ وصل بيشوى البيت لقى حاجه غريبه جداً
باب الشقه مكسور والشقه مكركبه واخوه مش موجود
بيشوى ساكن فى منطقه جديده فى منطقه صحراويه ، الشارع فاضى دايماً يعنى من السهل اى حد يعمل اى حاجه من غير ما حد يشوفه
اتصل بيشوى بمديره وقاله لو اخويا حصلتله حاجه هاشرب من دمك
بعدها نزل جرى على القسم يبلغ ، عمل محضر وقال فيه كل حاجه من اول الإمضاء بتعته لغاية خطف أخوه ، وسمّعهم التسجيلات كلها واتهم فيه مديره بانه وارء خطف اخوه
قامت الشرطه بضبط وإحضار مدير بيشوى فى الشغل الأستاذ سامى لكن موبيلاته إتقفلت وساب الشركه ومش موجود فى بيته ، إختفى تماماً
فى نفس اليوم الساعه ١:٣٠ بعد نص الليل جه تليفون من مديره سامى بيقوله لو عاوز اخوك تانى تعالى استلمه بس تجيبلى كل التسجيلات اللى معاك وقاله العنوان
بسرعه بيشوى راح القسم وقالهم على كل اللى حصل
وقرر ظابط المباحث تجهيز قوه خاصه تطلع للمكان المتفق عليه
وهم فى الطريق جات رساله لبيشوى من أخوه على الواتس فيها الموقع الموجود فيه  
الغريب فى الموضوع ان الموقع ده بعيد تماماً عن العنوان اللى هم رايحنه
ساعتها أكتشفوا ان العنوان اللى رايحنه ده فخ لبيشوى عشان مديره سامى يخلص منه تماماً
القوات قسموا نفسهم مجموعتين مجموعه راحت العنوان اللى قاله سامى والمجموعه التانيه راحت على الموقع اللى وصلهم من أخو بيشوى لكنهم راحوا لقيوا حاجه غريبه تماماً
اللى خاطف أخو بيشوى ناس تانيه خالص غير سامى  
الناس دى كانت بتخطط لسرقة أعضاءه وبالفعل كان مُجهز تماماً للعمليه ولحقوه فى اللحظات الأخيره
تم تحرير جورج أخو بيشوى والقبض على العصاب ، وتم أيضاً القبض على سامى اللى انتهز فرصة خطف اخو بيشوى وأدعى انه هو اللى خاطفه عشان ياخد التسجيلات
الأعجب من ده كله
تانى يوم بيشوى فتح الفيس واول كلمه عينه جات عليه كانت .
لا تخف لأنى معك . 
بقلم/#كيرلس_فتحى 













شارك بتعليقك
فيسبوك ()
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.