البحث

تابعنا على

العودة الى الرئيسية

دينة بنت يعقوب ! سمعتوا عن واحدة اسمها دينة في الكتاب المقدس... طب ايه اللي حصل معاها... دينة بنت يعقوب اللي اعتدي عليها ... معقولة ... وهل ذكرت في الكتاب المقدس

منذ 2 شهر
January 12, 2019, 12:51 am
دينة بنت يعقوب ! سمعتوا عن واحدة اسمها دينة في الكتاب المقدس... طب ايه اللي حصل معاها... دينة بنت يعقوب اللي اعتدي عليها ... معقولة ... وهل ذكرت في الكتاب المقدس

مواضيع عامة

 

دينة بنت يعقوب !

سمعتوا عن واحدة اسمها دينة في الكتاب المقدس. طب ايه اللي حصل معاها. اسمع ياسيدي اسمعي ياستي
دينة بنت يعقوب اللي اعتدي عليها . معقولة . وهل ذكرت في الكتاب المقدس آه . فين
في تكوين ٣٤ .
دينة هي البنت الوحيده ليعقوب ، اللي ولدتها ليئه بعد ٨ اولاد ( ٦ كانوا منها و٢ من الجاريه ) لما تقرا تكوين ٢٩ و ٣٠ هتلاحظ ان كل ولد خلفته ليئه كانت بتقعد تتأمل وتصلي وتديه اسم مليان جمال وصفات ( شمعون الله يسمع ، راؤبين الله يرى ، وهكذا مع ال ٨ اولاد . ) 
الا دينة ، قال الكتاب ثُمَّ وَلَدَتِ ابْنَةً وَدَعَتِ اسْمَهَا "دِينَةَ". نقطه وانتهي الكلام 

من البدايه حسيت ان دينة دي مش في الحسبان ، وجودها مش فارق اوي يعني ، محدش ركز معاها يوم ما اتولدت ، ماهي بنت علي ٨ اولاد
ومين عارف يمكن اتقالها "انتي جيتي غلطه" 
واضح ان محدش من العيله اهتم بيها عشان مفيش ذكر واضح ليها في الكتاب ، قولت يمكن احساسي غلط بس في تكوين ٣٤ اتاكد احساسي .

خَرَجَتْ دِينَةُ ابْنَةُ لَيْئَةَ الَّتِي وَلَدَتْهَا لِيَعْقُوبَ
لِتَنْظُرَ ( بَنَاتِ الأَرْضِ )
فَرَآهَا شَكِيمُ ابْنُ حَمُورَ الْحِوِّيِّ (رَئِيسِ الأَرْضِ )
َأَخَذَهَا وَاضْطَجَعَ مَعَهَا وَأَذَلَّهَا . تك ٣٤
خرجت تنظر بنات العالم ، اصل البنوه والانتماء لله مش مجرد كلام ، ده كمان بيحتاج جسد يعلم ويفهم ويقدم قبول واحتواء ، حب وتشجيع .
قابلها رئيس العالم ، رئيس سلطان الهواء ، اعتدي عليها اذلها سلبها بكورية الجسد ، وده ييجي ايه قدام بكورية النفس والروح اللي اتسلبت من زمان .

أَحَبَّ الْفَتَاةَ وَلاَطَفَ الْفَتاةَ
في الوقت اللي اهملناها وسطينا ، ابليس فتح احضانه بالموت ، لاطف الفتاة
ما الوعاء الفاضي مكان لزبالة الغريب.

هاج اخواتها الكبار شمعون ولاوي وباقي الاصحاح بخطه غريبه قتلوا كل بني حمور .
لكن بعد ايه ، فاقوا متاخر اوي ، دينة انتهت .

مفيش ذكر تاني لدينة في باقي الكتاب ، بس في قلب الله اتحفر بالدم اسم ، اسم بيتردد في السما "دينة" .

- عارف في كام دينة وسطينا ، كام دينة بتضيع ، كام دينة واقعه من اهتمامنا بعد ما وقعت من عينينا 
دينة كل ولد وبنت في كنايسنا وعائلاتنا جفت عندها ابار الحب والاهتمام ، كل ولد وبنت مفيش شئ مميز شفناه فيهم وعزلناهم بعيوننا المريضه .
ونرجع نهيج ونفوق يوم ما نعرف انها ضاعت وراحت مننا
في الوقت اللي بعدم امانه بننساها ، ابليس بينصب شباكه ، فاكرهم ، هو عنده شباك كتير ، ومعظم شباكه بتُنصب للمتروكين
وفي الوقت اللي بتقرا الكلام ، في كذا دينة نازله تنظر بنات العالم ، والعدد الاكبر تحت مذلة الاعتداء .

- دور علي دينة في اللي حواليك .

- ولو حاسه انك دينة ، فانتي محبوبه .
ورغم عدم امانتنا هو هيفضل امين ، قيمتك مش من عيون الناس ، قيمتك في ثمن غالي اتدفع فيكي ، البسي ثياب عزك ثياب قيمتك الحقيقه، ثياب بنوتك لله
اوعي تسيبي بيته وتنزلي ، مجدك جوه بيت الآب.
طب بنحكي الكلام دلوقتي ليه
دا احنا داخلين علي العيد ومش مناسب نحكي عن دينه
لأ مناسب
ايه مناسبته 
اقولكم ليه عشان بناتنا

اه اهلها بيهتموا بيها اه بس اهتمام جسدي
اكل وشرب وفلوس تشتري اللي في نفسها
لكن فيه اهتمام روحي
للاسف مش قادر اكمل
الاحسن نصلي لكل دينة حوالينا
ده اللي في ايدينا عشان مترحش مننا
مريم انطون













شارك بتعليقك
فيسبوك ()
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.