البحث

تابعنا على

العودة الى الرئيسية

كل ما تحس إنه إنتَ في حاجات في حياتك معكننة عليك.. قوم شوف الجواب اللي سابته هولي للعالم كله قبل ما تودعنا وتروح للسما..

منذ 2 شهر
January 12, 2019, 12:38 am
كل ما تحس إنه إنتَ في حاجات في حياتك معكننة عليك.. قوم شوف الجواب اللي سابته هولي للعالم كله قبل ما تودعنا وتروح للسما..

مواضيع عامة

 

كل ما تحس إنه إنتَ في حاجات في حياتك معكننة عليك قوم شوف الجواب اللي سابته "هولي" للعالم كله قبل ما تودعنا وتروح للسما 
"هولي" فتاة أُسترالية عندها ٢٧ سنة، عانت لفترة من حياتها بمرض "السرطان" لحد ما إتوفت وأهلها قرروا ينشروا الورقة اللي كانت كاتبة فيها كل حاجة هي فهمتها كويس بعد ما تعبت 
ملخص رسالة هولي: "خليك ممتن للحاجات التافهة اللي بتعكنن عليك وإحمد ربنا إنها مش خطر على حياتك أو على حياة حبايبك وبعدها خد نفس عميق وبص للدنيا وإنت حامد ربنا إنك قادر تتنفس، لإن كل يوم جديد هو هدية من ربنا ليك مش حق مكتسب"
وبدأت هولي تشرح في جوابها كل حاجة بتعكنن علينا وهي متستاهلش زي الطريق أما بيكون زحمة، زي عيالك أما مش بينيموك من زنهم، أو حتى زي الكوافير اللي قصلك شعرك أكتر من اللي إنتِ عايزاه" عارفين ليه هي متستاهلش؟ عشان أما تلاقي الموت بيقرب منك كل الحاجات دي مش هتسوى أي حاجة وهتتمنى بس ساعتها إنك تقضي ولو عيد ميلاد زيادة أو تلحق تحتفل بالعيد وسط أهلك لآخر مرة 
حتى الحاجات اللي إحنا بنركز عليها وفاكرينها مهمة، وفي حاجات تانية أهم منها 
زي إهتمامنا بإن جسمنا يكون حلو عشان نتبسط، من غير ما نهتم إزاي نشبع باقي إحتياجتنا في السعادة 
زي إهتمامنا بإننا ناخد سيلفي حلوة عشان نبين أد إيه إحنا مبسوطين، من غير ما نحاول فعلًا نستمتع بالمكان اللي حوالينا ونشكر ربنا على إننا فعلًا مبسوطين 
حتى في الحاجات البسيطة زي إننا نحط ميكاب وننزل نشتري لبس عشان يكون شكلنا قدام الناس حلو، وننسى إننا نفسنا نسمع صوت العصافير الصبح بدل الميكاب ونفسنا نسافر بدل ما نجيب فستان جديد 
في الآخر هولي قالت جملة علقت معايا أوي:
If something is making you miserable, you have the power to change it. You don't know how much time you have got on this Earth, so don't waste it by being miserable"
يعني من الآخر لو في حاجة معكننة عليك حياتك إنت َفي إيدك تغيرها، عشان إنتَ مش عارف فاضلك أد إيه في الدنيا دي، فمتضيعش اللي فاضلك بإنك تكون متعكنن" 
زي مثلًا إننا بنحاول نعيش حياتنا بالشكل اللي الناس دايمًا بتصورهولنا إنه الحياة المثالية الصح اللي هتسعدنا رغم إنك ممكن تكون نفسك تعيش حياة روتينية عادية فلو ده اللي هيسعدك "إعمله"!! 
ونهت جوابها برسالة لينا كلنا إننا نتبرع بالدم، عشان كل مرة بنتبرع بننقذ حياة ٣ أشخاص، وهي قدرت تعيش لسنة زيادة وسط حبايبها بسبب الناس اللي كانت بتتبرع، عشان كده لو في إيدك إنك تتبرع وتساعد حد إنه يعيش أكتر وسط حبايبه إوعى تتأخر" 
جواب هولي من إمبارح قاعدة بقرا فيه، وناوية أطبع منه جمل وأعلقه عندي في الأوضة من كتر ما هو صادق وحقيقي، عشان كل ما حاجة تضايقني أفتكر إنه الحياة مش مستاهلة كل ده حقيقي مش مستاهلة✋













شارك بتعليقك
فيسبوك ()
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.